雅虎香港財經 【離岸戶口】開戶教學 海外虛擬銀行開戶有乜賣點同要求？
部署移民都想開定海外戶口，預先入定錢做生活費。入門之選係外國虛擬銀行，不過揀銀行唔好齋睇名氣，仲要睇申請門檻同銀行財力。
開UK PostBox啟動郵件轉運
開立海外虛擬銀行戶口，英國虛擬銀行係熱門選擇。不過開戶通常要求一個有效英國地址，唔少人會借居英朋友地址登記，唔想麻煩到人，亦可以在UK PostBox開個郵箱。
UK PostBox係一間郵件轉運公司，原理好似我哋網購再搵轉運公司將貨送到香港。在UK PostBox開戶方法唔難，步驟如下：
1.到UK PostBox網頁按SIGN UP
2.揀免月費計劃，再揀倫敦PO Box
3.再揀「Letter PAYG」，收到信時才需要支付1.2英鎊服務費
4.確認Order後，再輸入姓名、電郵、登入密碼、香港地址，揀Personal戶口
5.輸入出生日期、香港電話、開戶原因可填「For Receiving Mail」，收到SMS後按連結登入戶口再拍攝護照及自拍完成登記。
通常數日後戶口就生效，UK PostBox會提供Postal Address同Parcel Address，開虛擬銀行戶口就用Parcel Address登記。
英國虛擬銀行開戶兩大難題
英國虛擬銀行雖然係熱門開戶選擇，但近來「負評」越來越多。例如人氣度最高的Monzo，近大半年持續傳出虧損、財務狀況不穩消息。亦因為海外申請者眾，不斷出現Reject申請情況。另一間Revolut業績同樣牙煙，2019年全年勁蝕1.065億英鎊。
財政不穩固然係一大難題，另一難題係開戶多技術關卡。以Revolut為例，要成功開戶最好買一張英國電話卡收確認SMS，再加UK PostBox地址，並用VPN扮英國上網下載APP同使用BNO護照登記先可以成功開戶。唔怕煩都可以按步驟（參考圖1）登記，但謹記不要大注入錢到戶口，減少銀行執笠錢被套牢風險。
Dukascopy三大賣點
擔心英國虛銀唔穩陣，亦可考慮瑞士虛擬銀行Dukascopy。Dukascopy對想開立海外戶口港人有三大賣點，首先係銀行有一定實力。Dukascopy早於2004年成立，總部設於瑞士日內瓦，並於多個城市設有辦公室，當中包括香港。Dukascopy公布2020年財報，營收2800萬美元同比增長74%，淨利潤達1380美元。
第二項賣點係開戶便捷，使用香港手機號碼、地址、特區護照或BNO，透過手機App就可以開到戶口（參考圖1），毋須籌措外國地址、電話卡及VPN。第三項賣點係服務多元化及提供存款保障，開立多貨幣戶口，可選擇23種存款外幣，亦可以投資加密貨幣，並提供Debit Card服務。至於存款保障就有10萬瑞士法郎，相當於87萬港元。
Dukascopy對海外客戶開戶規定較寬鬆，不過亦要留意有兩項規矩。一是設有存款5萬美元上限，想存多啲可以用網上Chat或電郵聯絡客戶服務，放寬條件主要考慮你的收入，收入夠多兼提交到證明存款上限可增至10萬美元。二是開戶填妥資料後客戶服務會經App打個Video Call畀你，開戶時先有心理準備簡單回答身份核實問題（如問你姓名同出生日期），完成後同日就可以完成審核開到戶，匯錢到戶口就完成激活程序。之後仲可以經App申請實體Debit Card，實體卡並會寄到香港，方便日後在海外提款及購物。
伸延閱讀：
